Sueche mir di?

 

Hesch du scho lang mau wöue ä Heud si?

We du dr quietschend, schreg Roulade gflickt hesch, bisch du fürd Frou Müller ä Heud.

Da drzue bruchsch du aus Superchraft eifach Gschick, paart mit ärä grosse Portion logischem Dänke u äs Lächle im Gsicht. Ja, guet. Das isch chli eifach xeit. Paar Wärchzüg de scho o no...

 

Bisch du öpper, wo gärn mit dä Häng büglet?

Ob grobschlächtig oder filigrans Knübu – dini Häng wirsch bruche, um die no fasch neue (40-jährige) Sunnestore bi Glousers zrepariere…

 

Bisch du ä Macher u säubständigs Schaffe ghört für di eifach drzue?

Mit dim eigetä Amsler-Böss u dim Bude-Telefon erledigsch du Tagesbüetz bi Studers alleini oder zäme mit dr Babs und/oder mit em Chef. Ja, genau. Dr Chef isch o no täglich dusse ud Büetz ud Chunde mache ihm o nach fasch 20 Jahr immer no viu Fröid.

 

Du bisch fit u we am Abä dArmä mau chli schwär si, fingschs eigenltich no guet, wüud weisch, wasd gmacht hesch?

Perskindol-Abgab isch zwar im Arbeitsvertrag nid greglet, we du zBavona bi Sutters montiert hesch, empfiehlt sichs aber, ä Tube dahei zha. Dr Job verlangt körperlich einiges ab.

Übrigens schaffe Störeler viu uf Leitere u haut überau dert, wos Store het. Äs bitzli Abentürer, fruchtlose Akrobat u taffä Schwärgwichtshäber sötte auso o no zu dini viune Talänt ghöre.

 

Du hesch früecher scho gärn am Töffli u Muetters Näiimaschine umgeschrubt, Kniffuspiu si für di immer z'eifach xi u du hesch villech sogar ä Mech-Bruef glehrt?

De bisch du füre Bruef vom Störeler definitiv scho guet usgrüstet. Wed de o no uf Qualität, Professionalität, Exakheit, gueti Ideä u Engagement steisch u Zouggs ke Schrecke bechöme, we du bi ihne dürd Stube loufsch, de müesse mir unbedingt mau zäme rede.

 

Schaffe isch für di näbstem Läbesungerhaut verdiene o mit Fröid u Befriedigung verbunde? Du wettsch öppis feschts u längerfristigs wo sogar meh chönnt wärde?

Das cha dir Amsler Store biete. Lueg doch einisch dWebsite a u du fingsch paar Fakte zur Gschicht, wo scho fasch 50-jährig isch.

Amsler Store suecht im Momänt ä Storemonteur. Du wirsch guet iglehrt u lehrsch zBudeli, dArbeit u aues wichtige u weniger wichtige, wo aber o drzue ghört, guet kenne. U wär weis, was drus no wird?

 

Bisch du parat, di Platz imne chline, familiäre Team iznäh?

Babs, üsi Allrounderin, gueti Seu u Sunneschiin im Büro, ir Wärchstatt u uf dr Bousteu, u ig, dr Chef, bruche Ungerstützig.

Wed bis hie häre no nid wägklickt hesch, bisch du ville üse nöi Storemonteur.

Bewirb di mit Läbeslouf, Zügniss u Motivationsschribe oder -video uf s.zwahlen@amslerstoren.ch. Mir fröiie üs, di gli kennezlehre.

 

Kontakt 

Amsler Storen Thun
Stefan Zwahlen

Seestrasse 18
3600 Thun

Facebook

Wo Sie uns finden

Teilen mit

Amsler Storen Thun [-cartcount]